wHiSkY． cHuBbY．sTrObE

要搬竇先,

個 space 好似有問題, post 唔到野, 冇相就 OK......頂X 10000000000

==>  http://hk.myblog.yahoo.com/angelangelkoko/

 

 

其實本應要寫下我個 US Trip  既野先, 不過仲好忙, 又未執哂 d 行李, 都係等得閒 d 至補寫番~

我見 d friend 0向 facebook 度寫 16 項關於自己, 等我又寫下先.....

 

1.我好細個時已經結 0左 婚, 當時未夠 21 歲, 都冇真真正正享受過逗利事既樂趣, 細細個就慣 0左 派錢比人, 同前度老公感情一直好好, 雖然無奈要分開, 但好多謝佢比番自由和快樂給我, 不過如果佢每月準時 d 過數, 咁我會更加開心~

2. 一直好喜歡小動物同 b b, 以前喜歡狗多過貓, 自從養 0左 貓之後, 即刻變 0左 心~ ~

3.以前有諗過會生 b b, 不過自津津出世後, 我既湊 b 心願已經達成, 再加埋 carly, 遲下又再多個姨甥仔, 真係諗起都驚驚地, 但係如果我真係有 0左 b b, 都一定會要既~~ 不過一定唔會再婚~~ 因為覺得結婚係一件好 on 居既事.

4. 自從比苗師傅睇過風水之後, 令我對八字命理好感興趣, 開始相信命中注定....同對佛學認識多 0左, 領悟亦多 0左, 現在還在學習中, 更希望有機會就傳遞相關訊息比 d 有苦惱既朋友, 希望佢地都能領悟因果道理, 唔好為眼前事而執著同唔開心......

5. 我做人好冇所謂, 覺得只要大家開心, 蝕底些又有咩所謂, 除非蝕唔起, 咁就冇辦法......不過有 d 人會覺得我好人, 但有 d 人會覺得我 on 居.....

6. 我以前掛住拍拖, 100 % 重色輕友, 所以 lost 0左 好多保貴既友誼, 最 best friend 排行只得陳嘉儀, 之後係粱凱欣, 再之後就係蘇巧敏, 不過蘇巧敏佢為 0左 3000 蚊, 十年前已經冇再找我, 人間蒸發 0左.

7. 我係一個好慢熱既人, 又唔主動, 如果對方唔主動同我打開話題既話, 我係唔太識同人陌生人傾計的......dead air , 好尷尬....

8. 自從離婚之後, 至發覺自由既可貴, 開始擴大番自己既朋友團子,  識 0左 好多新朋友, 舊朋友又搵得番, 成個人好似重新咁.

9. 酒量好差, 但係好想自己飲得, 因為好想出去玩時可以飲得起, 玩得開心 d....

10. 我對愛情好冷莫, 我唔係果 d 成日要聽住對方巴聲, check 住另一伴行蹤果種女人, 但唔代表我唔愛佢 bor, 最記得以前老公埋怨過自己點解唔主動 call 佢, 我話冇咩特別事唔駛 call 啦, 佢就話: 傾下閒計都得 0者.........(真係無聊), 之後佢覺得呢個缺點反而係我既優點! 因為唔痴身~

11. 自從離婚之後, 再識 0左 個勁痴身男朋友......之後怕 0左 拍拖, 怕比人管住......冇自由係我大忌

12. 而家識朋友多 0左, 開始覺得自己做人好求奇, 我發覺人家好有心思......自己真係做唔到, 人 0地 每做一件事都可以好仔細去做, 我就好求奇, 永遠做得唔夠人好, 可能真係屬於性急既人....

13. 好想過舒適既生活, 好想活得比以前更好, 成日發夢搵件有錢既另一伴, 可以唔駛撈!

14. 自從睇完瘦身男女, 決心減肥, 減肥成功之後, 愛上了跑步~

15. 好鬼多嗜好, 彈琴, 影相, 種花, 養貓.......冇樣 pro...

16. 我鍾意人叫我 KO, 我 D best friend 都叫我 KO, 我覺得 KO 帶比我 lucky, 近年多個新名叫 "阿做", 呢個名我都 like~

 

由於天煞黑星既出現,  今日陪隻牛去拜太歲先, 我地去到等小巴.....而依 ? 條龍都好長下 bor......就 0向 我排小巴途中,  見到賣太歲衣 d 舖頭寫住, 牛．龍．馬．羊．狗, 今年都犯太歲喎......嘩! 除 0左 我同爸爸之外, 我 "嵌" 家都犯太歲, 既然泥到, 就幫哂佢地拜太歲, 拜過安心先, 兩條友, 幫 6 個人拜, 拎到我屎下屎下....又多人, 不過總算搞掂哂, 之後返阿媽度食飯, 再返屋企執野, xx 送上一個請安電話, 叫我出遠門一切小心, 同好好享受同摰友相聚, 傾多 d 咁喎......

唔知係咪大家真係夾呢, 其實問心果句丫, xx 絕對唔係一個好情人, 不過硬係佢講咩, 我都 0岩 聽, 從來冇同佢拗, 識我既人, 都知我包拗頸同好有主見家嘛~~ 哈, 係對住佢呢, 我就咩都由佢決定, 真係自己都唔知點解~~或者大家真係有緣掛.....

 

 

 

 

 

 

 

0尋 晚同 xx 迎接己丑年既來臨, 我地兩個申....., 一個申年, 一個申日出生既人, 當遇到丑, 就會有天喜,  天喜係代表開心, 高興既事, 所以我預測今年既牛牛年, 我 0地 應該都會過得如意同開心~~

0尋 晚好夜至訓, 今日訓到 2 點至起身去阿媽度, 之後一家出街食飯,  再例牌出旺角掃下街~~.......其實如果每年都可以同屋企人, 開開心心咁過新年, 都已經好開心~~我希望我既屋企人, 身邊既朋友, 都可以開開心心, 平平安安咁過活就好 lu....

 

 

呢個星期, 忙住幫嘉儀買野, 今日都買得 7 7 8 8, 嘉儀托我幫佢買 d concert DVD, 0尋 晚一口氣買 0左 12 隻......有...

 

1. 左麟右李 04 開心演唱會 (譚詠麟,李克勤)
2. 你的克勤演奏廳
3. 郭富城舞林正傳演唱會 2007
4. 陳慧琳 love fighters 演唱會 2008
5. 劉德華 wonderful world 香港 2007
6. 學友光年世界巡迴演唱會07
7. eason's moving on stage 1 (陳奕迅)
8. 草猛 forever grashopper collection concert 06
9. 酷愛張敬軒 演唱會
10. air justin 08 live (側田)
11. show mi 鄭秀文 2007 演唱會
12.袓戀明歌演唱會 (容祖兒, 黃耀明)

我自己都想煲哂 D 碟先拎比佢, 所以今日放工, 連煲 0左 兩張.......唔知我初 3 前, 可唔可以煲得哂呢 ?

唔係化.......阿女,  你而家先泥作病......媽媽就快要出遠門  喇, 我怕唔夠時間  e 你喎.......唉! 你快 d 好番啦!

strobe 而家眼紅紅, 眼簾同眼白都紅紅地, 又瞇瞇下咁........唉, 阿女玩野添..... 點線好!

grace 0岩 0岩 send 比我架條 link, 超級可愛~~

今日 send 0左 個 msn 比 xx, 叫佢有時間就 call 我, 冇幾耐, 佢就 call 我, 原來佢唔 0向 香港, 咁我大約講 0左 少少想搵佢做咩事比佢知, 叫佢返到香港得閒先再打比我啦,  咁我一心諗住佢都係過一兩日至會 call 我啦, 之後夜晚同阿鍾 msn, 傾下佢間屋......傾傾下.....我諗 10 點鐘咁上下啦.....xx 竟然打比我, 話已經 0向 我樓下...,  eeee 咁鬼涷, 又要換衫落街.......算啦, 因為原來 XX 以為我趕住話番比朋友知, 所以一返到香港就搵我喇 ........其實丫, 我都想快 d 覆番阿鍾, 不過我知 xx 佢好忙, 我都唔想打擾佢, 所以我一心諗住等佢真係得閒先至搞我 d 野,   估唔到佢又快成咁, 所以我就同阿鍾傾傾下就話比佢知, 我要落一落街先喇, 阿鍾仲話 xx 佢對我好好.......其實呢......我都覺得係, 雖然大家好少見面, 好少聯絡, 但係佢總會比我 feel 到佢有幾緊張我..........唉....唔識講, 唔識形容......

之後傾完返上屋企, 覆番阿鍾, 總算做 0左 我好想幫阿鍾做既野!  唔知點解, 我同阿鍾真係好投契, 佢又對我好好, 我真係好希望自己能夠幫到既, 都盡力去幫佢, 佢真係好好人架.....!

呢個把鬼 MSN Space, 搞到我冇乜 mood update 個 blog.......

 

講下果個 "鵝記" 寬頻先, 次次講親佢, 我就把幾火架喇......... 話說一年前已經知道自己會搬屋, 亦唔打算再用"鵝記", 所以 contract 完 0左 半年, 我情願比貴 d 都唔肯續約, cut 佢果陣時已經預早兩個月, fax 哂野比佢地, 又話我張 form 唔 0岩, 佢再 fax 張 form 比我, 見到張 form,  我頂 x 100000,   同我果張一Q 樣, 仲要係曚查查添, 廢 Q 事理佢, 再 fax 多次, 又有人 call 我, 話我冇寫 a/c 冧巴,  寫番 fax 多次, 又冇人再 call 我........之後臨 cut 前一個月, 咁 0岩張 credit 咭比人盜用, 個 autopay cut 0左, 咪打去睇下點交埋最後果個月數比佢囉, 順便 cfm 下有冇同我做取消戶口既 request ........  頂 x 100000000000........佢竟然答我話冇做, 仲要話冇收過我 fax 屎...........呢條 pk 我即刻問佢貴姓, 叫佢同我企 0向 個 fax 屎機面前, 我即刻再 fax, 要佢同我即刻 cfm 收唔收到, 呢條 pk 就話 d fax 佢冇咁快收得到.......好! 我算, fax 完轉頭再 call 佢, 佢又講緊電話, 咁我同另一條友再講番個 story, 點知呢條友又話幾月幾號已經收到我 fax 屎, 已經做0左......( 心諗, 之前果條戉里丫.......%^xy$%^^#.....), 好 ! 有做就算喇,  咁我話比佢知, 我個 autopay cut 0左, 問佢點交, 佢又 up 一大輪廢話, 又話可以到時還 modem 時交埋, 我問佢攞還 modem 個地址, 佢又死都唔肯比我, 又話戶口一正式取消之後就會有信通知我.......我話我果陣時會搬 0左, 叫佢而家比 0左 我先 or 寄定比我先, 佢又話要等戶口取消先得.......呀之呀 0左 一輪之後, 我同佢講, 如果要等戶口取消 0左 先寄比我, 你就要寄去新地址, 叫佢 mark 低新地址.........., 其間我都收到幾次  "鵝記"寬頻打比我, 叫我續約呀.......一係就 update grade 唔知幾多 mb, 不過要簽 contract 咁呀......"心諗 : pk,  我 a/c 都取消埋喇, 你有冇 check 架? "  同埋覺得佢地好流, 所以我都` pps 交埋最後果個月先, 廢事欠佢!

 

之後返舊屋還鎖匙, 最後一次攞埋 d 信.......頂 + 妖 x  100000000000000000,  果封還 modem 通知書, 真係寄 0左 去舊地址...... "鵝記" d services 真係好到冇人有,  .唉, 既然都收到封信, 都算鬼數喇!      點知搬屋其間太忙太亂, 我都唔知封信塞 0左 去邊樹,  依希記得1個月內要還個爛鬼 modem..........哼... 還掂過哂期, autopay 又 cut 0左, 唔鬼還, 扮收唔到封信先, 吹脹咩~~

哈哈哈.......大約 4 個月左右啦, 就有收數公司追我數,  500 蚊??? 聽到都嬲到震,  狂插果條收數佬......之後 "吸" 佢線, 如事者, 佢每隔十幾日就打次電話比我, 每次我都會喪鬧佢, 狂數我同"鵝記" d 恩恩怨怨,  除非我唔得閒, 我就 cut 佢線, 唔聽佢電話, 佢成日叫我 call 返 "鵝記" 攞地址還 modem, 我就堅持要"鵝記" call 我, 我唔會再打去, 比果 d 阿豬阿狗, 9 唔搭 8, 又要我由頭講一次, 之後唔知做 0左 d 咩出泥......., 我要佢地自己了解 0左 個 case, 主動 call 我囉!

 

後來我得閒 d, 就上 0左 "鵝記" 個網頁 send 0左 message 投訴, 之後就有人 call 我, 搞掂哂 d 野喇, 總算完結 0左 件事!

 

其實都好好笑架, 因為最後一次同果條追數佬傾電話, 我地既通話內容係不斷重復

我         : 要佢 0地 親自打比我先!

阿鐘買 0左 樓喇, 真係恭喜佢榮升業主, 尋日約 0左 佢同埋阿珊一齊 tea, 順便比 d 裝修意見.....真係超巧合啦, 佢層樓同 xx 屋企係一模一樣, 尾埋眼我都知佢間屋係點樣, 佢個裝修公司報 0左 有 d 野似乎唔可行咁 bor........但係價錢又真係幾低下,   點都好啦, 等我問下 xx 意見, 希望可以以最慳錢既方法, 做到最實用既效果啦~

今個新年, 原本一早約 0左 哉時同阿 Meg 佢 0地 去 b b q, 但係 0尋 晚我仲咳咳咳......今朝好爭扎夠竟去好唔去好........... .......終於, 比阿女 chubby 攪醒之下, 餵完佢地食缶缶之後, 我都決定照出去  ~~ strobe 唔知係咪尋晚慶祝除夕食得飽得濟..........今朝冇胃口食野添........... 唉, 阿女冇胃口, 搞到我有 d 擔心佢唔知係咪病病添.....不過頭先見佢冇咩野, 咁都安心 d.....

好耐都冇試過真係去郊野公園燒野食喇~~ 所以覺得幾正 ~~佢地講開病時會睇中醫, 諗諗下, 我走之後都去 0左 睇中醫.......希望快 d 好番啦!

咳.咳.咳........咳地渡過 2008........唉.......

MSN 而家搞到不知所謂咁,  又要學人扮 facebook, 勁唔好用, 我想 0向 blog 度 load 相又超嗱麻煩. .....再係咁, 唔鬼用佢, 我帶埋 3 個乖仔乖女搬家架喇.....哼!

今日去 0左 申請美國 visa, 雖然我已經簽過兩次, 但係心情仍然好緊張, 因為今次係帶埋媽咪, 敏菁, 同津津一齊去見.......

我 0地 網上去預約 0左 9 點 15 分, 去到都超多人,  排隊交完 from 我估都已經用 0左 粒幾鐘, 之後入去等叫冧巴, 我 0地 等 0左 好耐, 好耐......  遲過我地既冧巴都見哂, 都未到我 0地,  心諗......唔通人多要等耐 d...... ? 之後差不多 12 點, 先輪到我地, 不過就好鬼簡單, 係咁易問 d 問題就 ok 0左, 好似好易咁  .........點知.......

我 0地 交哂郵遞 d 野, 拎番個手提電話, 走 0左 之後冇幾耐, anik 就打 比敏菁, 原來 11 點時, 領事館打去屋企, 又問敏菁有冇女, 又問地址, 又問 anik 係邊個, 又問 anik 做 0左 幾耐, 又問佢個女有幾大..........嘩....係咁起底,  之後我打返去公司, 公司都話領事館都有打去, 問我做 0左 幾耐.........跟住敏菁同事又話有, 仲問敏菁間公司做 d 咩.......真係誇張, 唔怪之得我地要等咁耐啦, 因為佢一定 call 唔到媽咪丫嘛, 媽咪公司得佢一個, 邊有人聽電話喎.........

不過點都好, 而家簽到, 真係安落哂........ 仲有, 好多謝果位好有心祝我 good luck 既人~~ 一出泥就收到你 message, 好開心~~

繼上次食蟹蟹, 我同 XX 到而家都未見過面,  期間只係通過兩次電話咋~~係咪好搞野呢~~不過真係好 free 好自由自在架~~

咁我 0尋日開始放一個 week 大假, 由於 XX 都唔知我放假, 所以我就好靜靜地咁抖 0左 一日 , 到 0左 夜晚, XX 打電話比我, 原來佢病到 9 彩, 把聲都變埋, 又話而家去睇 E 生, 又話好番至再搵我...... 收 0左 線之後諗諗下, 還掂放假, 睇下佢駛唔駛我陪佢啦, 於是乎我就 SEND 0左 個 SMS 比佢, 話如果想我陪佢就 CALL 我啦.....之後冇耐, XX 就電話到喇....."我 10 分鐘響你樓下等你".....吓!? 咁快? 咁是但啦.........陪佢去 0左 "發覺" 睇 E 生, 睇完都成點鐘,  天生好多野講既 XX, 病 0左 都係不停咁講野, 不過睇完 E 生之後, XX 講咩我都只可以用個  "吓" 字泥應佢, 因為佢失聲兼走音囉~~ 原全聽唔到佢講咩~~

到 0左 今日, 佢已經好番好多 lu  , 起碼我唔駛 吓吓 聲丫嘛~~~ hahahaa.....

新年既旅行計劃, 正在籌備之中, 而家有 plan A 同 plan B, plan A 比較麻煩, 都唔知搞唔搞得成, 如果唔得, 就 plan B 喇........當然, 我都希望 plan A 成功啦, 咁我就可以探多年冇見既老友 lu......

呢幾日 0向屋企都上唔到個 space, 點知今日 0向 家姐屋企又上到喎.......屎火喇, 唔通屋企部腦出 0左 事 ?

今日 surana 幫我借 0左 教協証, 去買暖毯, 可惜冇貨, 要訂, 咁我 0地 就 0向 教協度買下野, 我第一次去果度買野, 原來超多人同埋有好多野買, 我都買 0左 4 佰幾蚊野至落到樓....heheheee.....真係好多謝 surana 特登幫我借張教協証, 感激感激........

 

之後我搭小巴返屋企, 發生 0左 d 好搞笑 0既 事........就係小巴 c 機既一段電話內容, 呢位小巴 c 機, 睇怕都有 50 幾歲........  佢一路等客一路講電話, 最後我都忍唔住笑 0左 出泥...... 雖然我聽唔到電話裡面既人講 d 乜 (不過大約都估到 d ), 好搞笑~~

 

小巴 c 機 : ......... (唔太記得佢開頭講 d 乜)